Vereinsreise vom 22. Mai 2025

Wie jedes Jahr werded das mal 21 reisefreudigi Fraue a de bekannte drü Standort in Embrach vom Reisebus abgholt. Eusi Präsidentin, d Esther Büchi, empfangt eus herzlich. Im Uftrag vo Hess-Car fahred mir im Car vo de Firma Knöpfel, es isch de Herr Heinz Knöpfel sälber, wo eus chauffiert. Es isch en trüebe, regnerische Tag. In Rorbas fahred mir a frisch gschorete Schaf verbi, die höche Gräser lönd ihri Chöpf lampe. Dänn gahts nach Teufen, verbi a de „alte Post" und am „Wyberg". Dur Flaach mit de schöne Riegelhüser, verbi a Spargelfälder, Räbe und Hopfe.

Im Restaurant „Zum Buck" in Rheinau werded mir fründlich empfange zu Kafi und Gipfeli, herrlich! Das Wirtshus isch im Jahr 1492 bout worde. 9.50 Uhr isch Ufbruch, 10 Minute z'Fuess, zu de Füerig i de Chloschterchile. Mini Schwöschter und ich erkundet underdesse d' Musiginsle, die wunderschöne Gärte mit Lavendel und Rose, die prächtig Aalag mit ihrne schöne Gebäude, alles suber und pflägt. -

Nach guet einere Stund gaht eusi Fahrt wiiters nach Schaffhausen - Thayingen - Orsingen - Nenzingen in Dütschland. Im Hotel & Restaurant „Schönenberger Hof" gnüüssed mir en feine Zmittag, es wird plauderet und glacht.

Mir werded am Viertel ab Drü in Reichenau zunere nächschte Füerig erwartet: „Augia Felix-Kloster und Wein": Uf de Fahrt det ane gahts verbi am Zellersee, später am Gnadesee. De Strass entlang isch alles saftig grüen, zwüschedine lüüchted wildi Holderebüsch. Träffpunkt isch bim "Münster St. Maria und Markus". Es blast en chalte Wind, mir früred alli. Drum füert eus de Herr Franke, euse „Chloschter-Reiseleiter" , scho gli emal is Münschter ine, er hät Verbarme mit eus Fraue. Mir erfahred so viel Interessants, s'Einte oder s'Andere bliebt hoffentlich hange. Bim Rundgang dur d'Gärte vo de Alag müend mir dänn doch no eusi Schirm ufmache. - Jetzt gahts no Richtig Vinothek zur Verkoschtig vo 3 Inselwy. Es isch luschtig und fröhlich zue und her gange, de Herr Franke hät eus mit grossem Wüsse, viel Charme und Witz begleitet. Im Chloschterlade und de Vinothek häts natürli Allerlei zum „Pöschtele" gha.

Jetzt gahts heiwärts. Bim Anelaufe zum Car schient d'Sunne und git herrlich warm. Ohni Stau füert de Herr Knöpfel eus i sim komfortable Bus sicher dur de Verchehr. Um die halbi siebni chömed mir in Embrach a. Mir bedanked eus ganz herzlich bi de Esther für de schön Tag!   M. Bättig

Aktuell

Aktivitäten